(ក្រុងស៊ាងហៃ)៖ ការសិក្សាថ្មីមួយបានឲ្យដឹងថា វីរុសផ្តាសាយថ្មីដែលត្រូវបានរកឃើញនៅក្នុងសត្វជ្រូក មានហានិភ័យឆ្លងរាលដាលដល់មនុស្ស ហើយត្រូវការតាមដានយ៉ាងយកចិត្តទុកដាក់ក្នុងករណីដែលវាក្លាយជា“ វីរុសឆ្លងរាតត្បាត” ។ នេះបើយោងតាមប្រភពភ្នាក់ងារសារព័ត៌មានរ៉យទ័រ(Reuters)ដែលចេញផ្សាយនៅថ្ងៃទី៣០ ខែមិថុនា ឆ្នាំ២០២០នេះ។
ជំងឺផ្ដាសាយជ្រូកប្រភេទថ្មីនេះមានឈ្មោះថា(G4)ដែលវាកកើតចេញពីមេរោគ(H1N1)ដែលធ្លាប់ជាមេរោគរាតត្បាតកាលពីឆ្នាំ២០០៩កន្លងទៅ។ វាជាមេរោគដែលអាចឆ្លងមកមនុស្សបាន មិនខុសពីមេរោគ(H1N1)នោះទេ ប៉ុន្តែបច្ចុប្បន្ននេះស្ថិតក្រោមការឃ្លាំមើលនៅឡើយ មិនទាន់មានឆ្លងមកមនុស្សនោះទេ។
ក្រុមអ្នកវិទ្យាសាស្ត្របានយកមេរោគដែលរកឃើញនៅលើសត្វជ្រូកនោះទៅពិនិត្យ មើលឃើញថាវាមានសមត្ថភាពអាចបម្លែងកោសិការបស់ខ្លួនបានដើម្បីរស់នៅក្នុងខ្លួនមនុស្ស។ រោគសញ្ញារបស់មេរោគនេះ គឺបណ្ដាលឱ្យមនុស្សមានអាការៈក្ដៅខ្លួន ក្អក និងកណ្ដាស់ជាដើម។ ប្រសិនបើមនុស្សមានសភាពទន់ខ្សោយ ហើយឆ្លងមេរោគនេះ វាអាចនឹងបណ្ដាលឱ្យធ្ងន់ធ្ងរបាន៕
