(ភ្នំពេញ)៖ ពិធីការិនីរូបស្រស់កញ្ញា ហ៊ិន ច័ន្ទនិរ័ត្ន ដែលជាពិធីការនីសម្បូរទៅដោយវោហារមិនចេះរឹងស្ងួត បានធ្វើឲ្យមានការភ្ញាក់ផ្អើលនិងចាប់អារម្មណ៍ដល់មហាជនពិសេសអ្នកគាំទ្រ ខណៈនៅសុខៗស្រាប់តែនាងប្រកាសជាសាធារណៈអំពីគម្រោងត្រៀមចូលរោងការ។ ដំណឹងនៃការប្រកាសអំពីគម្រោងត្រៀមចូលរោងការពីសំណាក់កញ្ញា ហ៊ិន ច័ន្ទនិរ័ត្ន ពេលនេះបានធ្វើឲ្យទស្សនិកជនជាច្រើនកំពុងមានចម្ងល់ថា ហេតុអ្វីបានជាស្រីស្អាតរូបនេះបើកចិត្តក្លាហាន ហ៊ានទម្លាយការពិតឲ្យសាធារណជនបានដឹងយ៉ាងនេះ ខណៈកន្លងមកនាងតែងតែបដិសេធពីដំណឹងស្នេហាជាមួយបុគ្គលមួយចំនួនបន្តបន្ទាប់មកហើយ។
បើយោងតាមការបង្ហោះរបស់កញ្ញា ហ៊ិន ច័ន្ទនិរ័ត្ន នៅលើបណ្ដាញសង្គមហ្វេសប៊ុកផ្ទាល់ខ្លួនដែលបានភ្ជាប់នឹងរូបភាព១សន្លឹកស្ថិតក្នុងឈុតសម្លៀកបំពាក់ប្រពៃណីបុរាណកញ្ញាបានសរសេរដោយខ្លីថា៖«ឆ្នាំនឹងអត់ទាន់ការព្រោះជំងឺកូវីដ-១៩ ចាំឆ្នាំក្រោយ»។ ខ្លឹមសាររបស់កញ្ញា ហ៊ិន ច័ន្ទនិរ័ត្ន នេះដែរបានធ្វើឲ្យអ្នកគាំទ្រមួយចំនួនធំនាំគ្នាភ្ញាក់ផ្អើល៕
