ការ​បង្ក្រាប​​ទ្រង់ទ្រាយ​ធំ ! ជនអន្តោប្រវេសន៍ជនជាតិវៀតណាម​ជិត​៥០​នាក់ ​ត្រូវ​បាន​រក​ឃើញ​នៅ​លើ​សា​ឡង់​បូម​ខ្សាច់ ​

(​កោះកុង​)៖ កម្លាំង​នគរបាល​អគ្គនាយកដ្ឋាន​អន្តោប្រវេសន៍ ​នៃ​ក្រសួងមហាផ្ទៃ ​សហការ​ជាមួយ​ព្រះរាជ​អាជ្ញារង​ខេត្តកោះកុងបាន​ចុះ​ពិនិត្យ​បង្ក្រាប ​និង​រក​ឃើញ​ក្រុម​ជនអន្តោប្រវេសន៍​ជនជាតិ​វៀតណាម​ចំនួន​៤៩​នាក់​កាលពី​រសៀល​ថ្ងៃទី០​៨​ ខែកក្កដា ឆ្នាំ២០២០ម្សិលមិញ​ ដែល​កំពុងស្នាក់នៅ ព្រមទាំង​ធ្វើការ​ខុសច្បាប់​លើ​សា​ឡង់​បូម​ខ្សាច់,​នៅ​ស្រុក​ស្រែអំបិល​,ខេត្តកោះកុង។ សមត្ថកិច្ចបាន​បញ្ជាក់ថា ការ​ស្រាវជ្រាវ​រក​មិនឃើញ​ឯកសារ​សម្គាល់​លើ​ជនអន្តោប្រវេសន៍​ចំនួន​៤៩​ ក្នុងនោះ​ស្ត្រី​ចំនួន​៣​នាក់​ជា​ជនជាតិ​វៀតណាម​។

បើ​តាម​ឧ​ត្ត​ម​សេនីយ៍ឯក កែម សារឹម ពួកគេ​បាន​ស្នាក់នៅ ​និង​ធ្វើការ​លួចលាក់​ខុសច្បាប់​នៅ​លើ​សាឡង់​បូម​ខ្សាច់​ចំនួន​១៨​គ្រឿង​ នៅ​ចំណុច​ភូមិសាស្ត្រ​ចំណុច​ពាម​គយ​ភូមិ​បាក់​អង្រុត,ភូមិ​ឈើ​ទាស​ភ្នាស់,ឃុំ​ស្រែអំបិល ខេត្តកោះកុង​។ បច្ចុប្បន្ននេះ​ សមត្ថកិច្ច​របស់​លោកក៏​កំពុង​សួរនាំ​លម្អិត​ថែមទៀត​លើ​ជនអន្តោប្រវេសន៍​ម្នាក់​ពី​ប្រវត្តិ​នៃ​ការធ្វើដំណើរ​លួច​ចូល​ឆ្លងដែន​ខុសច្បាប់​ផ្លូវគោក​ឬ​ផ្លូវទឹក។ចំពោះ​ម្ចាស់​អាជីវកម្ម​បូម​ខ្សាច់​ដ៏​ធំជាងគេ​នៅ​ស្រុក​ស្រែអំបិល ខេត្តកោះកុង ត្រូវបាន​គេ​ស្គាល់​ឈ្មោះថា លឹម បុក​ ដែល​ផ្ដល់​ការ​អនុញ្ញាត​ជាទី​តាំង​ស្នាក់នៅ ​និង​ប្រកបមុខរបរ​រក​ឈ្នួល​បូម​ខ្សាច់​ប្រចាំថ្ងៃ​អោយ​ខ្លួន​។

គេ​នៅ​មិនទាន់​ដឹង​ព័ត៌មាន​ច្បាស់លាស់​ទេ ថា​តើ​ឈ្មួញ​​ឈ្មោះ លឹម បុក នេះ អាច​នឹង​រង​បន្តឹង​ទៅ​តុលាការ​តាម​ផ្លូវ​ច្បាប់​ដែរ​ឬ​យ៉ាងណា​នោះ ​មិន​អាច​មាន​សមត្ថកិច្ច​ជំនាញ​ណា​ម្នាក់​អាច​ពន្យល់​បានទេ​។ ដោយឡែក​លោក​ឧ​ត្ត​ម​សេនីយ៍​ទោ សំ ឃិត​វៀន ស្នងការ​នគរបាល​ខេត្តកោះកុង​ឱ្យដឹង​ដែរ​ថា នេះ​ជា​ការ​បង្ក្រាប​លក្ខណៈ​ទ្រង់ទ្រាយ​ធំ​មួយសម្រាប់​ឆ្នាំ​២០២០​ចំពោះ​ជន​អន្តោប្រវេសន៍​ខុសច្បាប់​ដែល​លួច​ចូល​ស្នាក់នៅនិង​ធ្វើការ​ខុសច្បាប់​លើ​ដែនដី​ខេត្តកោះកុង​។ កន្លងទៅ​មាន​យុទ្ធនាការ​ពិនិត្យនិង​បង្ក្រាប​ដែរ ​ដោយ​រកឃើញ​ចំនួន​តិចតួច​ប៉ុណ្ណោះបើ​ធៀប​នឹង​ពេលនេះ​។ជា​វិធានការ​រឹតបន្តឹងលោកស្នងការ​នគរបាល​ខេត្តកោះកុង​អះអាង​ទៀតថា​ លោកនឹងដាក់​ផែនការ​ដល់​មន្ត្រី​សមត្ថកិច្ច​អធិការដ្ឋាន​នគរបាល​ក្រុង​ស្រុក​នឹង​បង្កើន​បន្ត​សហការ​ពិនិត្យ​ស្វែងរក​ជន​អន្តោប្រវេសន៍​ខុសច្បាប់​បន្ថែមដោយ​មិន​ត្រូវ​ឱ្យ​ពួកគេ​ចូលមក​រស់នៅ​និង​ធ្វើការ​ខុសច្បាប់​ហើយមិនដឹង​ព័ត៌មាន​នោះទេ​៕