(ខេត្តកំពត)៖ ប្រជាកសិករដែលជាម្ចាស់គោកំពុងមានការភិតភ័យដោយដោយសារជំងឺកាចសា.ហាវកំពុងរាតត្បាតនិងធ្វើឱ្យគោប្រមាណជាង១០០ក្បាលបានងាប់ជាបន្តបន្ទាប់ដោយមិនទាន់ដឹងពីមូលហេតុច្បាស់លាស់នៅឡើយហើយគ្រួសារកសិករខ្លះត្រូវបង្ខំចិត្តលក់គោក្នុងតម្លៃទាបខណៈដែលមន្ត្រីជំនាញកំពុងប្រឹងប្រែងនិងបង្ការទប់ស្កាត់ការគំរាមកំហែងពីជំងឺដ៏កាច.សាហាវនេះ។ កសិកររស់នៅក្នុងភូមិដូនយ៉យឃុំដូនយ៉យស្រុកឈូកខេត្តកំពតបានរៀបរាប់ថា៖ ប៉ុន្មានសប្តាហ៍ចុងក្រោយនេះគោរបស់អ្នកភូមិមានអាការៈចម្លែកដូចជាកើតរោគក្តៅ,រងាញ័រ,មិនស៊ីស្មៅ,ឈឺជើង,ហៀរទឹកមាត់និងដើរមិនរួច។
ក្រោយមកប្រហែលមួយថ្ងៃឬពីរថ្ងៃគោដែលឈឺទាំងនោះក៏ចាប់ផ្តើមងាប់យ៉ាងទាន់ហន់បំផុត។ កសិករដដែលបានបន្តថា៖ ក្នុងស្ថានភាពបែបនោះដោយមានការភ័យខ្លាចផងនិងមានការបញ្ចុះបញ្ចូលពីឈ្មួញដើរទិញគោថាគោដែលឈឺមិនអាចព្យាបាលឱ្យជាសះស្បើយឡើងវិញទើបអ្នកភូមិចាប់នាំគ្នាលក់គោក្នុងតម្លៃថោកព្រោះខ្លាចខាតបង់ច្រើន។ លោក ម៉េង សន្តិភាព ប្រធានការិយាល័យផលិតកម្មនិងបសុព្យាបាលនៃមន្ទីរកសិកម្មខេត្តកំពតបានបញ្ជាក់ថា៖ កន្លងមកមានករណីគោងាប់ពិតមែនហើយប្រជាកសិករម្ចាស់គោក៏ភិតភ័យទើបនាំគ្នាលក់គោចេញជាបន្ទាន់ប៉ុន្តែមិនដល់ថ្នាក់អស់ពីក្រោលនោះទេ។
ក្រោយពេលចុះពិនិត្យផ្សព្វផ្សាយអំពីវិធានការទប់ស្កាត់និងព្យាបាលជំងឺគោពិសេសជំងឺអុតក្តាមនៅតាមស្រុកទាំង៧ក្នុងខេត្តគិតមកដល់ថ្ងៃទី២៥ ខែវិច្ឆិកា ឆ្នាំ២០២០ ទូទាំងខេត្តកំពតមានករណីរគោឈឺ២៦ករណី។ ក្នុងនោះគោងាប់ជាង១០០ក្បាលនិងឈឺជាង១.៥០០ក្បាល។ លោកប្រធានបានបញ្ជាក់ទៀតថានៅចំពោះមុខមន្ត្រីជំនាញនឹងបន្តវិធានដំណើរការតាមររយៈតំបន់ដែលមិនទាន់មានគោឈឺត្រូវចាក់ថ្នាំការពារ។ ចំណែកតំបន់កំពុងមានគោឈឺត្រូវផ្សព្វផ្សាយអំពីវិធានការអនាម័យការការពារនិងធ្វើការព្យាបាលជាបន្ទាន់៕
